Katla skorar sigurmark fyrir Fiorentina

Katla Tryggvadóttir, landsliðskona í fótbolta, skoraði sigurmark fyrir Fiorentina í leik gegn Parma í ítölsku úrvalsdeildinni.

Fiorentina vann leikinn 2:1 og fór upp í fjórða sæti deildarinnar með sjö stig eftir fjóra leiki.

Parma komst yfir á 28. mínútu, en Fiorentina jafnaði með marki úr vítaspyrnu rétt fyrir hálfleik.

Katla skoraði sigurmarkið tíu mínútum inn í seinni hálfleik. Þetta var fyrsta mark hennar í deildinni á þessu tímabili.

Birta Georgsdóttir kom inn á sem varamaður fyrir Parma þegar ellefu mínútur voru eftir af leiknum, en Áslaug Munda Gunnlaugsdóttir var ekki með í hópnum.