Mörg mörk í 1. deild kvenna

Í 1. deild kvenna í fótbolta voru fjórir leikir spilaðir í gærkvöldi. Það var mikið um mörk og spennandi úrslit.

Grótta og FHL gerðu 3:3-jafntefli á Seltjarnarnesi. Grótta er enn í toppsætinu með 28 stig, en FHL er í áttunda sæti með 14 stig. Mörk Gróttu skoruðu Nicola Douglas, Telma Sif Búðadóttir og Rakel Lóa Brynjarsdóttir. Fyrir FHL skoruðu Edda Maren Sonjudóttir, Alexis Wright og Christa Björg Andrésdóttir.

ÍA vann KR á heimavelli sínum á Akranesi, 3:2. Fyrsta mark ÍA skoraði Madison Schwartzenberger og hin mörkin skoraði Alliyah Rowe. Hjá KR skoraði Ólöf Freyja Þorvaldsdóttir bæði mörkin undir lok leiks. KR er í öðru sæti með 23 stig en ÍA er í sjötta sæti með 14 stig.

Völsungur vann 3:0 á móti Tindastóli á Húsavík. Völsungur er með ellefu stig í níunda sæti, sem er fallsæti, en Tindastóll er neðstur með þrjú stig. Mörk Völsungs skoruðu Ísabella Anna Kjartansdóttir, Auður Ósk Kristjánsdóttir og Hildur Arna Ágústsdóttir.

Keflavík vann Selfoss með 1:0 á Selfossi. Keflavík fór upp í fjórða sæti með 16 stig, jafnmörg og Selfoss í fimmta sæti.