Markús Andri spilar í Hollandi

Markús Andri Daníelsson Martin er 16 ára gamall og hefur skrifað undir samning við hollenska fótboltafélagið AZ Alkmaar. Hann kemur frá Stjörnunni, en fór nýlega í reynslu til Hollands.

Markús skrifaði undir samning sem gildir í þrjú ár. Hann er örvfættur varnarmaður, sem þýðir að hann notar helst vinstri fótinn. Hann er þekktur fyrir að vera öruggur með boltann og góður í að byrja sóknir.

Hann mun byrja að æfa með U17 ára liði AZ Alkmaar. Markús segir að AZ sé frábært félag fyrir unga leikmenn því það gefur þeim tækifæri til að þroskast og sýna hæfileika sína.

Markús er uppalinn í Hveragerði en spilaði með Stjörnunni síðasta vetur. Hann hefur einnig spilað 20 leiki fyrir yngri landslið Íslands.