Jafntefli á Húsavík

Í dag spiluðu Völsungur og Grótta fótboltaleik á Húsavík og leikurinn endaði með jafntefli, 2:2. Þetta var leikur í 1. deild karla.

Grótta er í áttunda sæti með 13 stig, en Völsungur er í neðsta sæti með sjö stig.

Heimamenn, Völsungur, skoruðu fyrsta markið á sjöundu mínútu. Það var Gestur Aron Sörensson sem skoraði.

Á 55. mínútu jafnaði Tristan Freyr Ingólfsson fyrir Gróttu. Elfar Árni Aðalsteinsson skoraði aftur fyrir Völsung með vítaspyrnu á 84. mínútu.

Þremur mínútum síðar tókst Mattíasi Kjeld að jafna fyrir Gróttu og leikurinn endaði 2:2.