Emelía skorar tvö mörk í sigri

Emelía Óskarsdóttir skoraði tvö mörk í leik þar sem lið hennar, Köge, vann 3:2 sigur á Kolding í dönsku úrvalsdeildinni í fótbolta.

Emelía skoraði fyrsta mark leiksins strax á fyrstu mínútu. Skömmu síðar jöfnuðu heimakonur leikinn. Emelía skoraði aftur á 33. mínútu og liðið hennar bætti við þriðja markinu á 71. mínútu. Kolding minnkaði muninn sex mínútum síðar.

Köge er á toppi deildarinnar með 29 stig. Það eru sjö stigum meira en næsta lið, Nordsjælland, sem á þó leik til góða.

Emelía lék sinn fyrsta landsleik fyrir Ísland á dögunum gegn Króatíu.